குரோம்பேட்டையில் மனைவியை மிரட்ட தீக்குளித்தவர் சாவு: காப்பாற்ற முயன்ற மனைவியும் பலி

குரோம்பேட்டை பொன்னியம்மன் கோவில் தெருவைச் சேர்ந்தவர் நாகராஜன் (25). பெயிண்டர். இவரது மனைவி அனிதா (23). நாகராஜனும், அனிதாவும் 5 வருடங்களுக்கு முன்பு காதலித்து திருமணம் செய்து கொண்டனர். 

இவர்களுக்கு தினேஷ் (3 1/2) என்ற குழந்தை உள்ளது. அனிதாவுக்கு அவரது கணவர் நாகராஜன் மீது சந்தேகம் இருந்தது. இதனால் இரண்டு பேருக்கும் இடையே அடிக்கடி தகராறு ஏற்படும். நேற்று இரவு 7 மணி அளவில் கணவன்-மனைவி இடையே தகராறு ஏற்பட்டது. 

உடனே தீக்குளிக்கப் போவதாக கூறி அனிதா தனது உடலில் மண்எண்ணையை ஊற்றிக் கொண்டார். இதனால் ஆத்திரம் அடைந்த நாகராஜன் மனைவியை மிரட்டுவதற்காக, கண் இமைக்கும் நேரத்துக்கள் தன் மீது மண்எண்ணை ஊற்றி தீ வைத்துக் கொண்டார். 

இதை சிறிதும் எதிர்பார்க்காத அனிதா அவரது கணவரின் உடலில் பற்றிய தீயை அணைக்க முயன்றார். ஏற்கனவே அனிதா உடலிலும் மண்எண்ணை இருந்ததால், அவர் மீதும் தீப்பற்றிக் கொண்டது. 2 பேரும் உடல் பற்றி எரித்த நிலையில் வீட்டில் இருந்து வெளியே ஓடி வந்தனர். 

அக்கம் பக்கத்தில் உள்ளவர்கள் வந்து தீயை அணைத்தனர். உடல் கருகிய நிலையில் உயிருக்கு போராடிய 2 பேரையும் கீழ்ப்பாக்கம் அரசு ஆஸ்பத்திரியில் சேர்த்தனர். அங்கு சிகிச்சை பயன் இல்லாமல் நாகராஜனும், அனிதாவும் பரிதாபமாக இறந்தனர்.